લીમોદરા ખાતે તળાવમાં નાહવા ગયેલ યુવકનું ઊંડા પાણીમાં ડૂબી જવાથી મોત નિપજયું

સુરત જિલ્લાનાં માંગરોળનાં લીમોદરા ખાતે તળાવમાં નાહવા ગયેલા ૧૮ વર્ષીય યુવકનું તળાવના ઊંડા પાણીમાં ડૂબી જવાથી મોત થયું હતું. મળતી માહિતી અનુસાર, હાલ લીમોદરા ગામની સીમમાં સ્વાગત ઈન્ડસ્ટ્રિયલ એસ્ટેટમાં આવેલ સાંઈ પેકેજિંગ નામની કંપનીનાં રૂમમાં રહેતો અને મૂળ રાજસ્થાનના જોગલસર ગામનો ૧૮ વર્ષીય સહીરામ છગનલાલ નાયક મજૂરી કામ કરતો હતો. સહીરામ ધુળેટીનો તહેવાર હોવાથી લીમોદરા ગામના તળાવમાં નાહવા ગયો હતો.

તે તળાવમાં ડૂબી જતાં ફાયરબ્રિગેડ અને કોસંબા પોલીસને જાણ કરવામાં આવી હતી. ત્યારે બનાવના સ્થળે દોડી આવેલી ફાયરની ટીમે તળાવના ઊંડા પાણીમાં કલાકો સુધી શોધખોળ કરતા સહીરામની લાશ મળી આવી હતી. જુવાન દીકરો ગુમાવતા પરિવાર ઉપર આભ તૂટી પડ્યા જેવી સ્થિતિનું નિર્માણ થયું હતું. બનાવ અંગે કોસંબા પોલીસે આગળની તપાસ હાથ ધરી હતી.

Author: Gujarat Samrajya