નવસારી રૂરલ પોલીસ મથકનો કોન્સ્ટેબલ લાંચ લેતા રંગે હાથ પકડાયો

નવસારી રૂરલ પોલીસ સ્ટેશનમાં પોલીસ કોન્સ્ટેબલ ચિરાગ રાઠોડને એન્ટી કરપ્શન બ્રાન્ચે ઇંગ્લિશ દારૂના ગુનામાં જામીન મુક્ત કરવા બદલ રૂ.૪૦ હજારની લાંચ લેતા રંગે હાથે ઝડપાઈ ગયો હતો. જ્યારે પી.એસ.આઈ. અમૃત વસાવા મળી નહીં આવતા વોન્ટેડ જાહેર કરાયો હતો. પોલીસ સ્ટેશનમાં જ એ.સી. બી. ટેપ થી પોલીસ ડીપાર્ટમેન્ટમાં ખળભળાટ વ્યાપી ગયો છે. સુત્રો પાસેથી મળતી માહિતી મુજબ, નવસારી રૂરલ પોલીસ સ્ટેશનમાં ઇંગ્લીશ દારૂનો ગુનો નોંધાયો હતો.

જેમાં આરોપી રહેલા એક વ્યક્તિએ કોર્ટ માંથી આગોતરા જામીન મેળવ્યા હતાં. જેને કોર્ટના હુકમ મુજબ અટક કરી જામીન ઉપર મુક્ત કરવાની કાર્યવાહી કરવા બદલ રૂરલ પોલીસ સ્ટેશનના જી.આઈ.ડી.સી. ચોકીના ઈન્ચાર્જ પી.એસ.આઇ. અમૃતભાઈ મગનભાઈ વસાવા અને પોલીસ કોન્સ્ટેબલ ચિરાગ સુરેશભાઈ રાઠોડે રૂ. ૪૦ હજારની લાંચ માંગી હતી. ફરીયાદી આ લાંચના રૂપિયા આપવા માંગતા નહીં હોવાથી એન્ટી કરપ્શનમાં ફરિયાદ કરી હતી. જેમાં એ.સી.બી.ના મદદનીશ નિયામક આર.આર.ચૌધરીના સુપરવિઝન હેઠળ એ.સી.બી. સુરત એકમના પી.આઈ. કે.આર.સકસેના સહિતની ટીમે ગોઠવેલા છટકામાં મંગળવાર નારોજ રૂરલ પોલીસ સ્ટેશનના પહેલા માળના કોમ્પ્યુટર રૂમમાં પોલીસ કોન્સ્ટેબલ ચિરાગ રાઠોડ ફરીયાદી પાસે લાંચના રૂપિયા સ્વીકારતા એ.સી.બી.ના હાથે રંગેહાથ ઝડપાયો હતો. જ્યારે પી.એસ.આઈ. અમૃત વસાવા મળી નહીં આવતા તેને વોન્ટેડ જાહેર કરાયો હતો.

Author: Gujarat Samrajya