માઉન્ટ આબુમાં બસની બ્રેક ફેઇલ થતાં અકસ્માત સર્જાયો, આ ઘટનામાં પાંચ મુસાફરોને ઇજા

માઉન્ટ આબુમાં મોટી દુર્ઘટના બનતા ટળી ગઇ હતી. ખાનગી ટ્રાવેલ્સ બસની બ્રેક ફેઇલ થતા ડ્રાઇવરની સમય સૂચકતાને કારણે મોટો અકસ્માત સર્જાતા ટળ્યો હતો. આ ઘટનામાં પાંચ જેટલા મુસાફરોને નાની મોટી ઇજા થઇ હતી. ગુજરાત ટ્રાવેલ્સની બસને માઉન્ટ આબુમાં અકસ્માત નડ્યો હતો.

માઉન્ટઆબુ ટોલનાકા પાસે બસની બ્રેક ફેઇલ થતા બસ રિવર્સમાં ધકેલાઇ હતી. જોકે બસ ડ્રાઇવરની સમય સૂચકતાને કારણે બસને મોટા પથ્થર સાથે ટકરાવી દેતા બસ ખાઇમાં પડતા બચી ગઇ હતી અને મુસાફરોનો જીવ બચી ગયો હતો. જોકે બસનાં અથડાવાના કારણે એક મોટું વૃક્ષ ધરાશાઈ થઈ ગયું હતું. સમગ્ર ઘટનાની જાણ થતાં સ્થાનિક લોકો તેમજ નજીકથી પસાર થતી પ્રવાસીઓની બસમાંથી લોકો મદદે દોડી આવ્યા હતાં. ટોલનાકાના કર્મચારીઓએ મુસાફરોને બસમાંથી સુરક્ષિત નીચે ઉતાર્યા હતા. આ ઘટનામાં ચારથી પાંચ જેટલા મુસાફરોને નાની મોટી ઇજા થઇ હતી.

Author: Gujarat Samrajya