હવામાન વિભાગના અહેવાલ અનુસાર કેરળમાં સત્તાવાર રીતે ચોમાસાની એન્ટ્રી થઈ ચૂકી છે. જે તેના નક્કી સમય એટલે કે તારીખ 1 જૂનથી આશરે એક અઠવાડિયા વહેલું કેરળ આવી પહોંચ્યું છે. આ સાથે 16 વર્ષમાં પહેલીવાર કેરળમાં ચોમાસાનું આગમન વહેલું થયું છે. આગામી સાત દિવસ ભારે વરસાદની આગાહી કરવામાં આવી છે. ઉલ્લેખનીય છે કે, રાજ્યમાં ચોમાસાનાં આગમન માટે તમામ અનુકૂળ પરિસ્થિતિઓ બની હતી. ઓછા દબાણવાળા વિસ્તાર અને આગળ વધતા ચોમાસાની સિસ્ટમના કારણે ગત બે દિવસમાં કેરળના અનેક ભાગમાં ભારે વરસાદ પણ નોંધાયો હતો. આ પહેલાં 2009 અને 2001માં આટલું વહેલા ચોમાસું આવ્યું હતું.
જ્યારે તે 23 મેના દિવસે રાજ્યમાં પહોંચ્યું હતું. હવામાન વિભાગનાં જણાવ્યાનુસાર કેરળમાં ચોમાસાના આગમનની સામાન્ય તારીખ 1 જૂન છે. જોકે, આઠ દિવસ પહેલાં જ ચોમાસાનું આગમન થઈ ગયું છે. 
જેમાં ચાર દિવસનું મોડલ એરર માર્જિન ચાલતું હતું. ગત વર્ષે ચોમાસાએ કેરળમાં 30 મે’નાં દિવસે આગમન કર્યું હતું. ચોમાસાનું સમયસર આગમન ભારત માટે એક મહત્ત્વપૂર્ણ પરિબળ છે, જ્યાં વાર્ષિક વરસાદનો લગભગ 70 ટકા જૂન-સપ્ટેમ્બરનાં સમયગાળા દરમિયાન થાય છે. સિંચાઈ, ભૂગર્ભજળ અને જળાશયોને ફરીથી ભરવા માટે ચોમાસાનો વરસાદ મહત્ત્વપૂર્ણ છે અને તેની સીધી અસર દેશના કૃષિ ઉત્પાદન અને ગ્રામીણ અર્થતંત્ર પર પડે છે. IMDએ 2025 માટે સરેરાશ કરતાં વધુ ચોમાસાના વરસાદની આગાહી કરી છે, જેનાથી ખરીફ સિઝનના પાકમાં રેકોર્ડ ઉત્પાદનની અપેક્ષા છે. ઉત્પાદન વધવાથી ગ્રામીણ આવક વધશે, ખાદ્ય સુરક્ષા વધશે અને દેશના આર્થિક વિકાસમાં કૃષિ ક્ષેત્રનો ફાળો વધશે.
વહેલા વરસાદથી ડાંગર, મકાઈ, કપાસ, સોયાબીન અને તેલીબિયાંના વાવેતરને વેગ મળવાની અને રવિ સિઝન પહેલા જળાશયોના પાણીના સ્તરમાં વધારો થવાની આશા છે. IMDએ આગાહી કરી છે કે, દક્ષિણ-પશ્ચિમ ચોમાસું દક્ષિણ અને મધ્ય અરબી સમુદ્ર, માલદીવ અને કોમોરિન વિસ્તાર, લક્ષદ્વીપના કેટલાક ભાગો, કર્ણાટક, તમિલનાડુ, દક્ષિણ અને મધ્ય બંગાળની ખાડી, ઉત્તર બંગાળની ખાડી અને ઉત્તરપૂર્વીય રાજ્યોના કેટલાક ભાગોમાં આ જ સમયગાળા દરમિયાન આગળ વધશે. જેની સમાંતર, દક્ષિણ કોંકણ-ગોવા કિનારાથી દૂર પૂર્વ મધ્ય અરબી સમુદ્ર પર એક ઓછા દબાણવાળી હવામાન પ્રણાલીની જાણ કરવામાં આવી છે. આ લૉ પ્રેશર સર્જાતા આગામી 36 કલાકમાં ઉત્તર તરફ આગળ વધતાં વધુ મજબૂત બની શકે છે અને સ્થાનિક હવામાન પેટર્નને પ્રભાવિત કરી શકે છે, જેના કારણે પશ્ચિમ કિનારાના ભાગોમાં વરસાદ અને પવનમાં ફેરફાર થઈ શકે છે.
દેશનાં કેટલાક ભાગોમાં ચાલી રહેલી ગરમીની સ્થિતિમાં રાહત મળવાની આશા વચ્ચે ચોમાસાની પ્રગતિ પર નજીકથી નજર રાખવામાં આવી રહી છે. અત્યાર સુધી, ચોમાસાના માર્ગમાં કોઈ મોટો વિલંબ કે વિચલન જોવા નથી મળ્યું. આ સમગ્ર ભારતમાં વરસાદ આધારિત કૃષિ વિસ્તારો માટે સકારાત્મક સમાચાર છે. ઉત્તર ભારતીય રાજ્યોની વાત કરીએ તો, IMDએ 25થી 30 જૂનની વચ્ચે આ પ્રદેશમાં ચોમાસાના આગમનની આગાહી કરી છે. આ પ્રદેશ દેશના દક્ષિણ અને મધ્ય ભાગો કરતાં થોડો મોડો મોસમી ફેરફારો દર્શાવે છે. પશ્ચિમ ભારતમાં 15થી 20 જૂન દરમિયાન ચોમાસાનો વરસાદ થવાની સંભાવના છે.
Users Today : 159
Total Users : 66440
Views Today : 235
Total views : 99862