દક્ષિણ ગુજરાતમાં હવે ધીમે ધીમે ચોમાસુ જામી રહ્યું હોય તેઓ માહોલ સર્જાયો છે. શનિવારે મધરાતથી વરસાદ વરસવાનું શરૂ થયું હતું. રવિવારે સવારે સાત વાગ્યા સુધી વરસાદની હાજરી જોવા મળી હતી. રવિવારે બપોર પછી પણ વરસાદી ઝાપટા પડ્યા હતા. દક્ષિણ ગુજરાતમાં સૌથી વધુ વરસાદ તાપી જિલ્લામાં નોંધાયો છે. કુકરમુંડામાં ત્રણ, વ્યારામાં અઢી. નિઝરમાં બે ઈંચ, ડોલવણમાં એક ઈંચ વરસાદ નોંધાયો છે.
વલસાડ અને સુરત જિલ્લામાં પણ સારો એવો વરસાદ નોંધાયો હતો. શનિવારે મધરાતથી શરૂ થયેલી મેઘરાજાની સવારી વહેલી સવાર સુધી વલસાડ અને સુરતમાં ફરી વળી હતી. જોકે સવારે વિરામ લીધા બાદ ફરી સાંજથી વલસાડ અને સુરતમાં વરસાદની હાજરી રહી હતી. વલસાડ જિલ્લામાં અત્યાર સુધીમાં કુલ સવા ઈંચથી વધુ વરસાદ ખાબક્યો હોવાનું વલસાડ જિલ્લા ફ્લડ કંટ્રોલ વિભાગનું કહેવું છે. વલસાડના વાપીમાં 26 મીમી અને પારડીમાં 8 મીમી, સુરતના ઓલપાડમાં 15 મીમી અને ચોર્યાસીમાં 4 મીમી પાણી પાડ્યું હતું. જોકે, છેલ્લા 24 કલાક દરમિયાન તાપી જિલ્લાના કુકરમુંડામાં ત્રણ, વ્યારામાં અઢી. નિઝરમાં બે ઈંચ વરસાદ નોંધાયો છે. સુરતમાં બફારાથી ત્રસ્ત થયેલા સુરતીઓ મોડી રાત્રે વરસાદ થતાં વાતાવરણમાં ઠંડક અનુભવી રહ્યા છે. હજી વરસાદી માહોલ જામ્યો છે અને ઝરમર વરસાદ શહેરભરમાં અલગ અલગ ઝોનમાં પડી રહ્યો છે.
