દેશમાં હજુ હોળીના તહેવારની તૈયારીઓ ચાલી રહી છે, પરંતુ કુદરતે પોતાનો મિજાજ બદલતા લોકોએ અત્યારથી જ આકરા ઉનાળાનો અનુભવ કરવો પડી રહ્યો છે. ઉત્તરથી લઈને પશ્ચિમ ભારતના મોટાભાગના રાજ્યોમાં તાપમાન સામાન્ય કરતા ઘણું ઊંચું નોંધાઈ રહ્યું છે. હવામાન વિભાગ (IMD) એ ચેતવણી આપી છે કે માર્ચના પ્રથમ સપ્તાહમાં જ ઉત્તર-પશ્ચિમ ભારતના મેદાની વિસ્તારોમાં કાળઝાળ ગરમી પડી શકે છે, જ્યાં પારો સામાન્ય કરતાં 3 થી 5 ડિગ્રી વધુ રહેવાની શક્યતા છે.
આગામી સપ્તાહમાં દિલ્હી, પંજાબ, હરિયાણા અને રાજસ્થાન સહિતના રાજ્યોમાં તાપમાન 2 થી 4 ડિગ્રી સુધી વધી શકે છે. ગુજરાત માટે સ્થિતિ વધુ ચિંતાજનક છે. હવામાન વિભાગના જણાવ્યા અનુસાર, 4 અને 5 માર્ચના રોજ રાજ્યના કેટલાક ભાગોમાં તાપમાનની સાથે અસહ્ય ઉકળાટ (હ્યુમિડિટી) અનુભવાઈ શકે છે. મહારાષ્ટ્ર અને મધ્યપ્રદેશમાં પણ વીકેન્ડ સુધીમાં તાપમાનમાં મોટો ઉછાળો જોવા મળશે.રાજધાનીમાં આકાશ ચોખ્ખું રહેશે, વરસાદની કોઈ શક્યતા નથી. મહત્તમ તાપમાન 34 ડિગ્રી સુધી પહોંચી શકે છે.સ્કાઈમેટ વેધરના રિપોર્ટ મુજબ ઇરોડ, સેલમ, મદુરાઈ અને અનંતપુરમાં પારો 37 ડિગ્રીને વટાવી ગયો છે.રાજસ્થાનના બાડમેર અને ફલોદીમાં ગરમીની તીવ્રતા સતત વધી રહી છે, જે માર્ચના બીજા પખવાડિયામાં વધુ વિકરાળ બની શકે છે. મેદાની વિસ્તારોમાં જ્યારે ગરમીનો કહેર વધી રહ્યો છે, ત્યારે હિમાલયના પહાડી વિસ્તારોમાં ‘વેસ્ટર્ન ડિસ્ટર્બન્સ’ સક્રિય થવાને કારણે થોડી રાહત મળી શકે છે. 3 અને 4 માર્ચ દરમિયાન જમ્મુ-કાશ્મીર અને પશ્ચિમ હિમાલયમાં હળવા વરસાદ કે હિમવર્ષા થવાની શક્યતા છે, જે ગરમીના મોજાને આંશિક રીતે રોકી શકે છે.
