સુરત ગ્રામ્ય LCBએ પોલીસની ખોટી ઓળખ આપી વેપારીઓ પાસે નાણાં પડાવતી એક આંતરરાજ્ય ગેંગનો પર્દાફાશ કર્યો છે. બારડોલી તાલુકાના વાંકાનેર ગામની હદમાં ગેસના બાટલા ભરેલા ટેમ્પોને આંતરી, પોલીસના નામે તોડ કરનાર ત્રણ શખ્સોને બે લક્ઝરી સ્કોર્પિયો કાર અને રોકડ સહિત કુલ રૂ. ૩૦,૫૧,૬૭૦/- ના મુદ્દામાલ સાથે દબોચી લીધા છે.
વિગતો અનુસાર બારડોલીના વાંકાનેર ગામની હદમાં ભારત ગેસ એજન્સીના ટેમ્પોને કાળા કલરની સ્કોર્પિયોમાં આવેલા અજાણ્યા શખ્સોએ રોક્યો હતો. આરોપીઓએ પોતાની ઓળખ LCB/SOG ટીમના ‘કિરણભાઈ’ તરીકે આપી હતી. તેઓએ ટેમ્પો ચાલકને ડરાવીને જણાવ્યું હતું કે તમે ઘરેલું ગેસના બાટલાનું કાળાબજાર કરો છો. આરોપીઓએ એજન્સીના માલિકને ફોન કરી વિડિયો ઉતારી પોલીસ કેસ કરવાની અને મીડિયામાં બદનામ કરવાની ધમકી આપી રૂ.૫૦,૦૦૦ પડાવી લીધા હતા.
આ બનાવની ગંભીરતાને ધ્યાને લઈ સુરત ગ્રામ્ય પોલીસ અધિક્ષક રાજેશ ગઢિયાના માર્ગદર્શન હેઠળ LCB અને પેરોલ ફર્લો સ્ક્વોડની અલગ-અલગ ટીમો તપાસમાં જોડાઈ હતી. દરમિયાન બાતમી મળી હતી કે આરોપીઓ મોતાગામની હદમાં એકલવ્ય સ્કૂલ પાસે નહેર નજીક કાળા અને સફેદ રંગની બે સ્કોર્પિયો કાર સાથે ઉભા છે. પોલીસે તુરંત જ દરોડો પાડી આરોપીઓને રોકડ રકમ, ૨ મહિન્દ્રા સ્કોર્પિયો અને મોબાઈલ ફોન સહિતના મુદ્દામાલ સાથે આબાદ ઝડપી લીધા હતા. આ પકડાયેલા આરોપીઓએ અન્ય કોઈ જગ્યાએ છેતરપિંડી કરી છે કે કેમ તે દિશામાં સુરત ગ્રામ્ય LCB એ તપાસ શરુ કરી છે.
પકડાયેલા આરોપીઓ: (૧) સલીમ નસીરખાન મેહર રહે.મોસાલી, મૂળ રાજસ્થાન (૨) ઉમરસખીર મોહમદ સરીફ કલર રહે.વાલોડ, મૂળ રાજસ્થાન (૩) યાસીન ઉર્ફે આસીન મોહમદ સરીફ કલર રહે.માંડવી, મૂળ રાજસ્થાન (૪) વોન્ટેડ: સીકંદર મુસેખાન કલર, રહે. માંડવી.
