નડિયાદ શહેરમાં ઓનલાઈન ડિલિવરી આપવાનું કામ કરતા યુવકને ફ્રેન્ચાઇઝી આપવાનું કહી કંપનીના કર્મચારી તરીકેની ખોટી ઓળખ આપી જુદા-જુદા ચાર્જના બહાને રૂપિયા ૪.૯૨ લાખની છેતરપિંડી કરી હતી. બનાવ અંગે નડિયાદ ટાઉન પોલીસે બે ગઠિયા સામે ગુનો દાખલ કર્યો હતો. મળતી માહિતી મુજબ, નડિયાદ મરીડા ભાગોળ હિદાયતનગરમાં રહેતા મોહમ્મદ સાહિલ મોહમ્મદ જાહિદ શેખ ઓનલાઇન ડિલિવરી આપવાની નોકરી કરે છે. 
મોહમ્મદ સાહિલના ઇન્સ્ટાગ્રામ પર ઈમેલ બાદ તારીખ ૫/૧૨/૨૪ નારોજ ડિલિવરી કંપનીની ગુડગાવ હેડ ઓફિસથી કંપનીના કર્મચારી ભરત પટેલ નામથી હિન્દીમાં ફોન આવ્યો હતો. જેમાં ડિલિવરી કંપનીની એજન્સી મેળવવી હોય તો ઇ-મેલ પર વિગત મોકલવાનું કહેતા યુવકે કંપનીની એજન્સી મેળવવા આધારકાર્ડ, પાનકાર્ડ, ફોટા વગેરે મોકલી આપ્યા હતા.
ત્યારબાદ કંપનીમાંથી ભરત પટેલ નામના કર્મચારીએ કન્ફર્મેશન લેટર માટે પ્રોસેસિંગની રૂપિયા ૨૫,૦૦૦ તથા તારીખ ૧૨/૧૨/૨૪ નારોજ એગ્રીમેન્ટની ડિપોઝીટ પેટે રૂપિયા ૭૫,૮૦૦ ઓનલાઇન ટ્રાન્સફર કરાવ્યા હતા. તારીખ ૧૩/૧૨/૨૪ નારોજ તમારું લાઇસન્સ તૈયાર થઈ ગયું છે કહી રૂપિયા ૧,૪૫,૦૦૦ ટ્રાન્સફર કરાવ્યા હતા. બાદમાં તમને ધંધો શીખવાડવા માટે કંપનીની ટીમ તમારે ત્યાં આવી ટ્રેનિંગ આપશે તેના ખર્ચ પેટે રૂપિયા ૯૬,૪૬૫ ઓનલાઇન ટ્રાન્સફર કરાવ્યા હતા. કંપનીમાંથી કોઈ ટીમ ના આવતા મોહમ્મદ સાહીલ તપાસ કરવા ગુડગાવ ગયા હતા જ્યાં આ નામની વ્યક્તિ કે કંપની ના હોવાની જાણ થતા છેતરપિંડી થયાનું જાણવા મળ્યું હતું. બનાવ અંગે મોહમ્મદ સાહીલ મોહમ્મદ જાવીદ શેખની ફરિયાદના આધારે નડિયાદ ટાઉન પોલીસે ભરત પટેલ તેમજ શુભમ ગુપ્તા બંને રહેવાસી ગુડગાંવ- હરિયાણા સામે સાયબર ક્રાઇમનો ગુનો નોંધી કાયદેસર કાર્યવાહી હાથ ધરી હતી.
Users Today : 148
Total Users : 66429
Views Today : 222
Total views : 99849