આંતરરાષ્ટ્રીય બજારમાં કૂડ ઓઈલની કિંમતોમાં સતત થઈ રહેલા વધારા વચ્ચે દેશની સૌથી મોટી ખાનગી ફ્યુઅલ રિટેલ કંપની નાયરા એનર્જીએ ગ્રાહકોને મોટો આંચકો આપ્યો છે. કંપનીએ આજે સવારથી જ પોતાના તમામ આઉટલેટ્સ પર પેટ્રોલની કિંમતમાં પ્રતિ લિટર રૂપિયા 5 અને ડીઝલની કિંમતમાં પ્રતિ લીટર રૂપિયા 3નો સીધો વધારો અમલી બનાવી દીધો છે. રિપોર્ટ અનુસાર, નવી કિંમતો આજે સવારથી દેશભરમાં આવેલા નાયરાના તમામ 7,108 ફ્યુઅલ સ્ટેશનો પર લાગુ થઈ ગઈ છે.
ઉલ્લેખનીય છે કે, આ પહેલા ઈરાન અને વેસ્ટ એશિયામાં ચાલી રહેલા રાજકીય તણાવના કારણે માર્ચ મહિનામાં કંપનીએ ભાવ વધાર્યા હતા. પરંતુ ત્યારબાદ સ્થિતિ થાળે પડતા અને કૂડના ભાવ ઘટતા તારીખ 1 જુલાઈના રોજ કંપનીએ વધારેલો ભાવ પાછો ખેંચી લીધો હતો. પરંતુ હવે ફરી એકવાર બેરલ દીઠ ક્રૂડ ઓઈલના ભાવ $100ની ઉપર પહોંચી જતાં કંપનીએ પોતાની પડતર કિંમત સરભર કરવા માટે ફરી ભાવ વધારો ઝીંક્યો છે. નાયરા એનર્જી દ્વારા કરાયેલો આ ભાવવધારો માત્ર તેના પોતાના પંપ પૂરતો જ સીમિત છે.
દેશના 90 ટકાથી વધુ ઈંધણ બજાર પર કંટ્રોલ ધરાવતી સરકારી તેલ કંપનીઓ-ઈન્ડિયન ઓઈલ, ભારત પેટ્રોલીયમ અને હિન્દુસ્તાન પેટ્રોલીયમએ પેટ્રોલ-ડીઝલના ભાવમાં કોઈ જ વધારો કર્યો નથી, જેથી સામાન્ય જનતાને સરકારી પંપો પરથી જૂના ભાવે જ ઈંધણ મળી રહેશે.(સૌજન્ય)
