વલસાડ LCB એ એક મોટી કાર્યવાહી કરતા પારડીના બગવાડા ટોલનાકા પાસે એક હાઈવા ડમ્પરને આંતરી તેમાંથી લાખો રૂપિયાનો વિદેશી દારૂનો જથ્થો ઝડપી પાડ્યો છે. પોલીસે આ મામલે કુલ રૂ.૬૦.૭૨ લાખથી વધુનો મુદ્દામાલ કબજે કરી એક આરોપીની ધરપકડ કરી છે.
મળતી માહિતી મુજબ, વલસાડ LCB ની ટીમ જ્યારે પેટ્રોલિંગમાં હતી ત્યારે તેઓને ખાનગી રાહે બાતમી મળી હતી કે સેલવાસથી એક અશોક લેલેન્ડ હાઈવા ડમ્પર નંબર ડીડી/૦૧/એચ/૯૪૩૨ ગેરકાયદેસર દારૂનો જથ્થો ભરીને નવસારી તરફ જઈ રહ્યું છે. આ બાતમીના આધારે પોલીસે બગવાડા ટોલનાકા પાસે વોચ ગોઠવી હતી.બાતમી મુજબનું ડમ્પર આવતા પોલીસે તેને અટકાવ્યું હતું. તપાસ દરમિયાન ડમ્પરના પાછળના ભાગે (ફાલકામાં) ઉપરના ભાગે રેતી ભરેલી જોવા મળી હતી. જોકે, રેતી હટાવીને તપાસ કરતા નીચેથી પ્લાસ્ટિક અને કાચની બાટલીઓ તેમજ ટીન ભરેલા વિદેશી દારૂના ૪૬૯ બોક્સ મળી આવ્યા હતા. પોલીસે આ મામલે દારૂ અને હાઈવા ડમ્પર સહિત કુલ રૂપિયા ૬૦.૭૨ લાખથી વધુનો મુદ્દામાલ કબજે ડમ્પર ચાલક શુભલાલ મોતીલાલ સાહુ (રહે.મધ્યપ્રદેશ) ની અટકાયત કરી છે. પૂછપરછ દરમિયાન તેણે જણાવ્યું હતું કે આ જથ્થો સેલવાસના ચીરાગભાઈ નામના વ્યક્તિએ ભરાવી આપ્યો હતો અને તેને ચીખલી પહોંચાડવાનો હતો.પારડી પોલીસે આ મામલે ગુનો નોંધીને ફરાર આરોપી ચીરાગભાઈને વોન્ટેડ જાહેર કર્યો છે અને આગળની વધુ તપાસ હાથ ધરી છે.
