ભારત સરકારના શિક્ષણ મંત્રાલય તરફથી લાગુ ત્રિભાષા ફોર્મ્યુલાનો તમિલનાડુમાં શરૂ થયેલો વિરોધ સતત વધી રહ્યો છે

ભારત સરકારના શિક્ષણ મંત્રાલય તરફથી લાગુ ત્રિભાષા ફોર્મ્યુલાનો તમિલનાડુમાં  શરૂ થયેલો વિરોધ સતત વધી રહ્યો છે. આ મુદ્દે ડીએમકેના સાંસદોએ સોમવારે લોકસભા અને રાજ્યસભામાં વિરોધ નોંધાવ્યો અને એક નિવેદન માટે શિક્ષણ પ્રધાન ધર્મેન્દ્ર પ્રધાનની માફીની માંગ કરી છે. ડીએમકેના જણાવ્યા અનુસાર ત્રિ-ભાષા ફોર્મ્યુલા દ્વારા હિંદીને તમિલનાડુમાં થોપવાનો પ્રયાસ કરવામાં આવી રહ્યો છે જે ખોટું છે. અમે તેનો સ્વીકાર કરીશું નહીં. આ દરમિયાન કોંગ્રેસે પણ ડીએમકેની ભાષા બોલવાની શરૃ કરી દીધી છે.

કોંગ્રેસના જણાવ્યા અનુસાર તમિલનાડુમાં બે જ ભાષા પૂરતી છે. ત્યાં ત્રીજી ભાષાનો સ્વીકાર કરી શકાય નહીં. તમિલનાડુ કોંગ્રેસના નેતા અને સાંસદ કાર્તિ ચિદમ્બરમે જણાવ્યું હતું કે તમિલનાડુનું વલણ સ્પષ્ટ છે કે બે ભાષાની ફોર્મ્યુલા પૂરતી છે. તમિલ ભાષા અમારી ઓળખ છે અને માતૃભાષા છે. અંગ્રેજી એટલા માટે જરૃરી છે કે કારણકે વિશ્વનો સંપર્ક તેના માધ્યમથી થઇ શકે છે. સાયન્સ અને કોમર્સ સમજવા માટે અંગ્રેજીની જરૂર છે. જોકે અમને ત્રીજી ફરજિયાત ભાષાની જરૃર નથી. કાર્તિ ચિદમ્બરમના આ વલણથી સ્પષ્ટ છે કે, કોંગ્રેસ પણ ભાષા વિવાદમાં ડીએમકેનું વલણ અપનાવશે.

તમિલનાડુમાં હિંદી વિરુદ્ધ તમિલનો મુદ્દો ચર્ચામાં છે. ડીએમકેને લાગે છે કે આ મુદ્દાથી તે સરળતાથી આગામી વર્ષે થનારી વિધાનસભા ચૂંટણી જીતી શકે છે. ભાષાનો મુદ્દો તમિલનાડુમાં સંવેદનશીલ વિષય છે. આ સ્થિતિમાં આ મુદ્દો ભાજપ માટે પણ ચિંતોનો વિષય બની ગયો છે. બીજી તરફ શિક્ષણ પ્રધાન ધર્મેન્દ્ર પ્રધાનનું માનવું છે, કે ત્રિભાષા ફોર્મ્યુલા અંગે તમિલનાડુ તરફથી સંમતિ દર્શાવવામાં આવી હતી. આ જ કારણે રાષ્ટ્રીય શિક્ષણ નીતિમાં તેનો સમાવેશ કરવામાં આવ્યો હતો. જો કે ત્યારબાદ તમિલનાડુ સરકારનું વલણ બદલાઇ ગયું હતું. જો કે ડીએમકેએ જણાવ્યું છે કે તેની તરફથી કોઇ ખાતરી આપવામાં આવી ન હતી.

Author: Gujarat Samrajya