જુગાર રમતા સાત જુગારીઓ ઝડપાયા

સુરત જિલ્લાનાં કામરેજ ગામમાં સુખદેવા સોસાયટીના મકાનમાં દરોડો પાડી જુગાર રમી રહેલા સાત સૌરાષ્ટ્રવાસી રત્નકલાકારોને જુગાર રમતા આબાદ ઝડપી પાડયા હતા. સુત્રો પાસેથી મળતી માહિતી મુજબ, કામરેજ ગામની સીમમાં સુખદેવ સોસાયટીમાં આવેલ ઘર નં-૧માં કેટલાક ઇસમો ભેગા મળી ગંજીપાના પત્તાથી જુગાર રમી રહ્યા હોવાની કામરેજ પોલીસને બાતમી મળી હતી.

જેથી પોલીસે આ મકાનમાં છાપો મારી જુગાર રમતા સાત શખ્સોને ઝડપી પાડયા હતા. આમ, પોલીસે બનાવના સ્થળેથી ૨૨,૪૬૦/- રોકડા અને ૨૩,૫૦૦/- કિંમતનાં ૬ મોબાઈલ ફોન મળી કુલ રૂપિયા ૪૫,૯૬૦/-નો મુદ્દામાલ કબજે કર્યો હતો. તેમજ પોલીસે જુગાર રમતા રવિ જગદીશભાઈ નારીયા, હિંમત કેસુભાઈ પટેલ, ઝવેર ભગવાનભાઈ પટેલ, જેરામ પરસોત્તમભાઈ વામજા, રાજેશ છગનભાઈ હજુડીયા, ધીરૂ મોહનભાઈ નારીયા અને લાલજી કાળાભાઈ પટેલ નાંઓની ધરપકડ કરી આગળની જરૂરી કાર્યવાહી હાથ ધરી હતી.

Author: Gujarat Samrajya