હત્યા કરી લૂંટ કરવાના ગુન્હામાં આરોપીનાં જામીન નામંજૂર

વાપીમાં વિધવાની હત્યા કરી લૂંટ કરવાના ગુનામાં સંડોવાયેલા આરોપી સમીર ઉર્ફે હનીફ મુંજેલાલ મંડલની રેગ્યુલર જામીન અરજી કોર્ટે નામંજૂર કરી હતી. છીરી ગામે તારીખ ૧૮-૦૪-૨૦૨૩ના રોજ ગાયત્રી કોમ્પ્લેક્સમાં રહેતી વિધવાની ગળે ટૂંપો આપી હત્યા કરાઈ હતી.

પોલીસે આ મામલે સમીર ઉર્ફે અમિત હનીફ મંડલ (રહે.વાપી, જી.આઈ.ડી.સી. ગુંજન ન્યૂ ગુજરાત હાઉસિંગ બોર્ડ), બહાઉદ્દીન ઉર્ફે રાજુ શાહીદુલ્લ મંડલ (રહે.વાપી જી.આઈ.ડી.સી., ગુંજન, ન્યૂ ગુજરાત હાઉસિંગ બોર્ડ)ની ધરપકડ કરી હતી. આ શખ્સોએ બિલ્કીસ પરવીન ઉર્ફે સોનિયાને મોતને ઘાટ ઉતારી હતી અને તેના ફ્લેટમાંથી રીયલમી તથા વિવો કંપનીના બે મોબાઈલ ફોન તથા સોનાના દાગીના તથા રોકડા રૂ.૫૦,૦૦૦ની લૂંટ કરી હતી. પોલીસે પકડેલા આરોપી પૈકી આરોપી સમીર ઉર્ફે હનીફ મુંજેલાલે જામીન ઉપર મુક્ત થવા વાપીની એડિશનલ સેશન્સ કોર્ટમાં અરજી કરી હતી. તે સામે ડીજીપી અનિલ ત્રિપાઠીની ધારદાર દલીલો ગ્રાહ્ય રાખી વિદ્વાન ન્યાયાધીશ ટી.વી.આહુજાએ આરોપીનાં જામીન નામંજૂર કરતો હુકમ કર્યો હતો.

Author: Gujarat Samrajya