ગાંધીનગર શહેર નજીક ચિલોડા હિંમતનગર હાઇવે ઉપર વિદેશી દારૂની સાથે હવે હથિયારોની પણ હેરાફેરી વધી છે પોલીસે વાહન ચેકિંગ દરમિયાન ચંદ્રાલા પાસે લક્ઝરી બસમાંથી મધ્યપ્રદેશના યુવકને પિસ્તોલ સાથે ઝડપી લીધો હતો 25 હજારનો મુદ્દામાલ કબ્જે કરીને પિસ્તોલ ક્યાંથી લાવ્યો હતો અને કોને આપવાનો હતો તે જાણવા માટે તપાસ શરૂ કરવામાં આવી હતી.
સુત્રો પાસેથી મળતી માહિતી મુજબ, ચિલોડા પોલીસની ટીમ ચંદ્રાલા પાસે વાહન ચેકિંગ કરી રહી હતી તે દરમિયાન રાજસ્થાન તરફથી આવી રહેલી એક બસને ઊભી રાખી હતી. સ્લીપર એવી લક્ઝરી બસમાં તપાસ કરતા એક મુસાફરે પોતાનો થેલો ચકાસવાની ના પાડી હતી. જેના પગલે પોલીસે શંકાને આધારે આ થેલામાં તપાસ કરતા તેમાંથી પિસ્તોલ મળી આવી હતી. જેના પગલે મધ્યપ્રદેશના ભીંડ ખાતે રહેતા બિલુસિંહ જગદીશસિંહ રાજપુત નામના યુવાનની ધરપકડ કરી લેવામાં આવી હતી અને પિસ્તોલ સંદર્ભે પૂછપરછ શરૂ કરવામાં આવી હતી. આ પિસ્તોલ ક્યાંથી લાવ્યો હતો અને કોને આપવાનો હતો તે જાણવા માટે મથામણ શરૂ કરવામાં આવી છે. હાલ તો 25 હજાર ઉપરાંતનો મુદ્દામલ કબ્જે કરીને આ યુવક સામે આર્મ્સ એક્ટ હેઠળ ગુનો દાખલ કરીને તપાસ કરવામાં આવી રહી છે.
