રશિયાના દૂર પૂર્વમાં આવેલ કામચાટકા વિસ્તારમાં શક્તિશાળી ભૂકંપના આંચકા અનુભવાયા હતા. યુરોપિયન-મેડિટેરેનિયન સિસ્મોલોજિકલ સેન્ટરના પ્રાથમિક આંકડા મુજબ, ભૂકંપની તીવ્રતા 7.0 નોંધાઈ હતી. બીજી તરફ, અમેરિકાના ભૂસ્તરશાસ્ત્રીય સર્વેક્ષણએ તેની તીવ્રતા 6.9 જણાવી હતી. પ્રાથમિક માહિતી અનુસાર, ભૂકંપનું કેન્દ્ર જમીનથી આશરે 140 કિલોમીટર ઊંડે હતો. ભૂકંપનું કેન્દ્ર રશિયાના વિલ્યુચિન્સ્ક શહેરથી લગભગ 123 કિલોમીટર દક્ષિણ-પશ્ચિમમાં હોવાનું જણાવાયું હતું. સ્થાનિક સમય પ્રમાણે બપોરે આશરે 3:35 વાગ્યે આ આંચકા નોંધાયા હતા. શરૂઆતની માહિતી મુજબ, આ ભૂકંપ બાદ સુનામીની ચેતવણી જાહેર કરવામાં આવી નહોતી. અમેરિકાના રાષ્ટ્રીય સુનામી ચેતવણી કેન્દ્રે પણ સુનામીનું જોખમ ન હોવાનું જણાવ્યું હતું. આ ઘટનાક્રમ વચ્ચે જાપાનમાં પણ ભૂકંપના આંચકા અનુભવાયા હતા.
અહેવાલમાં તેની તીવ્રતા 6.9 દર્શાવવામાં આવી છે. જોકે જાપાનની હવામાન વિજ્ઞાન એજન્સીએ ભૂલથી 9.9ની તીવ્રતાના ભૂકંપની પ્રાથમિક ચેતવણી જાહેર કરી દીધી હતી. આ આંકડો વાસ્તવિક ભૂકંપની તીવ્રતા સાથે મેળ ખાતો નહોતો. પ્રાથમિક અહેવાલો અનુસાર, બંને વિસ્તારોમાં ભૂકંપને કારણે જાનહાનિ કે મોટા નુકસાનની પુષ્ટિ થઈ નહોતી. જોકે તંત્ર પરિસ્થિતિ પર નજર રાખી રહ્યું છે. રશિયાનું કામચાટકા દ્વીપ પ્રશાંત મહાસાગરની આસપાસ આવેલા ‘રિંગ ઑફ ફાયર’ વિસ્તારમાં આવે છે. અહીં ટેક્ટોનિક પ્લેટોની હિલચાલને કારણે વારંવાર ભૂકંપ આવે છે.
આ વિસ્તાર કુરિલ-કામચાટકા સબડક્શન ઝોનની નજીક આવેલો છે, જ્યાં એક ટેક્ટોનિક પ્લેટ બીજી પ્લેટની નીચે સરકે છે. ગયા વર્ષે જુલાઈમાં આ વિસ્તાર નજીક 8.8ની તીવ્રતાનો શક્તિશાળી ભૂકંપ આવ્યો હતો. ત્યારબાદ અનેક દરિયાકાંઠાના વિસ્તારો માટે સુનામીની ચેતવણીઓ જાહેર કરવામાં આવી હતી. આ વિસ્તાર ભૂકંપની દૃષ્ટિએ જ નહીં, પરંતુ રશિયાની વ્યૂહાત્મક સુરક્ષાની દૃષ્ટિએ પણ મહત્ત્વનો છે.(સૌજન્ય)
