મામસા ઓવરબ્રીજ નજીક ટ્રક અને કાર વચ્ચેનાં અકસ્માતમાં એક યુવકનું મોત

ભાવનગરમાં મામસા ઓવરબ્રીજ નજીક ગંગામાની દેરીની પાસે ટ્રક અને કાર વચ્ચે અકસ્માત સર્જાતા એક યુવકનું મોત નિપજ્યું હતું. જ્યારે અન્ય બે મિત્રોને ઇજા પહોંચી હતી.

બનાવની વિગત મુજબ, હાદાનગર દેસાઈનગર પેટ્રોપંપની પાછળ રહેતા અને આઇપીસીએલમાં ફરજ બજાવતા બ્રિજેશભાઈ મનીષભાઈ પરમાર અને મિત્ર જયદીપભાઇ પ્રહલાદભાઈ માંડલિયા (રહે.ભરતનગર સીતારામનગર) અને મયુરભાઈ જીતેન્દ્રભાઈ ઝાલા (રહે.નંદનવન સોસાયટી, કાળીયાબીડ) તથા ધુ્રવભાઈ દિનેશભાઈ પરમાર (રહે.ચંદ્રહીલ સોસાયટી, લીલા સર્કલ) અને ફેનીલભાઈ ભુપતભાઈ ચૌહાણ (રહે.ખેડુતવાસ, ભાવનગર) સાથે  કોબડી ગામે મહેશભાઈ ઘેવરીયાની વાડીએ તારીખ ૨૧ જૂન ૨૦૨૫ જમવાનુ આયોજન હોવાથી કાર લઈને ગયા હતા અને જમ્યા બાદ કારમાં જયદિપભાઈ, બ્રિજેશભાઈ, મયુરભાઈ પરત ભાવનગર આવતા હતા ત્યારે મામસા ઓવરબ્રીજ ઉતરતા ગંગામાની દેરીની પાસે ટ્રકનાં ચાલકે પોતાનું વાહન પુરઝડપે ચલાવી કાર સાથે અથડાવી દેતા કારમાં સવાર ત્રણેય મિત્રોને ઇજાગ્રસ્ત હાલતે હોસ્પિટલે ખસેડવામાં આવ્યા હતા, જ્યાં જયદીપભાઈનું મોત નિપજ્યું હતું. આ બનાવ સંદર્ભે બ્રિજેશભાઈએ ટ્રક ચાલક વિરૂધ્ધ વરતેજ પોલીસ મથકમાં ફરિયાદ નોંધાવતા પોલીસે વધુ તપાસ હાથ ધરી હતી.

Author: Gujarat Samrajya