ભારત સરકારે ઈ-સિગારેટ પરના પ્રતિબંધને હળવો કરવાનો સ્પષ્ટ ઇનકાર કરી દીધો છે, જેના પરિણામે ‘હીટ-નોટ-બર્ન’ તમાકુ ઉત્પાદનો પરનો પ્રતિબંધ યથાવત રહેશે. ભારત સરકારના આ કડક વલણથી વિશ્વની દિગ્ગજ તમાકુ કંપની ફિલિપ મોરિસ ઇન્ટરનેશનલના તે પ્રયાસોને મોટો ઝટકો લાગ્યો છે, જે અંતર્ગત તેઓ ભારતમાં આવા ઉપકરણોને મંજૂરી અપાવવા માટે ખાનગી રીતે લોબિંગ કરી રહ્યા હતા. ભારત સરકારે 2019માં ઈ-સિગારેટ અને હીટેડ તમાકુ ઉત્પાદનો પર સંપૂર્ણ પ્રતિબંધ મૂક્યો હતો. નોંધનીય છે કે, ભારત વિશ્વનું સાતમું સૌથી મોટું સિગારેટ બજાર છે, જ્યાં વાર્ષિક 100 અબજથી વધુ સિગારેટનું વેચાણ થાય છે.
મંત્રાલયે વધુમાં જણાવ્યું હતું કે, ઈ-સિગારેટ સંબંધિત કાયદો હીટ-નોટ-બર્ન ઉપકરણો પર પ્રતિબંધ મૂકે છે અને ભવિષ્યમાં પણ આ સ્થિતિ યથાવત રહેશે. રિપોર્ટ અનુસાર, માર્લબોરો બનાવતી કંપની ફિલિપ મોરિસે ખાનગી રીતે ભારતના ટોચના અધિકારીઓ અને સંસદીય સમિતિ સમક્ષ ‘IQOS’ પાછળના વિજ્ઞાન અને સંશોધનને ધ્યાનમાં લેવા રજૂઆત કરી હતી. કંપનીનો હેતુ આ હીટ-નોટ-બર્ન ઉત્પાદનોને પ્રતિબંધમાંથી મુક્તિ અપાવવાનો હતો. કંપનીના અધિકારીઓએ આ વર્ષે જાન્યુઆરીમાં દાવોસ ખાતે યોજાયેલા વર્લ્ડ ઇકોનોમિક ફોરમ દરમિયાન પણ રાજ્ય સરકારના અનેક અધિકારીઓ સાથે મુલાકાત કરીને આવા ઉત્પાદનોને ભારતમાં મંજૂરી આપવા માટે પેરવી કરી હતી.
