કડોદરામાં પલસાણાથી કડોદરા તરફ આવતા સર્વિસ રોડ પર નેચરલ ચિકન સેન્ટર પાસે બાતમીના આધારે પોલીસે દરોડો પાડી એક મહિલાને ભારતીય બનાવટના વિદેશી દારૂ તથા બીયરના મોટા જથ્થા સાથે ઝડપી પાડી છે. પોલીસે કુલ રૂ. 54,392/-નો મુદ્દામાલ કબજે કરી દારૂ સપ્લાય કરનાર સેલવાસના શખ્સને વોન્ટેડ જાહેર કર્યો છે.
મળતી માહિતી પ્રમાણે કડોદરા પોલીસ મથકના એ.એસ.આઈ. ને મળેલ બાતમીના આધારે નેચરલ ચિકન સેન્ટર પાસે તપાસ કરતા, ત્યાં ઉભેલી મહિલાએ પોતાનું નામ કમુબેન પ્રતાપભાઇ વસાવા (રહે. કુંભારિયા, સુરત શહેર) હોવાનું જણાવ્યું હતું. પોલીસે મહિલા પાસે રહેલા પોટલાઓની તલાશી લેતા તેમાંથી રોયલ સ્પેશિયલ પ્રીમીયમ વ્હીસ્કી 144 બાટલી, રોયલ સ્ટેગ ક્લાસિક વ્હીસ્કી 96 બાટલી, કિંગફિશર સ્ટ્રોંગ બીયર ટીન 24 નંગ, બડવાઈઝર મેગ્નમ બીયર ટીન 48 નંગ જેટલો દારૂનો જથ્થો મળી આવ્યો હતો. પકડાયેલી મહિલાની પૂછપરછ કરતા જાણવા મળ્યું હતું કે, આ દારૂનો જથ્થો તેને ઉમેશ (રહે.સેલવાસ) નામના શખ્સે પૂરો પાડ્યો હતો. આ જથ્થો તે પોતાના ઘરે વેચાણ કરવા માટે લઈ જઈ રહી હતી.
