ઉમરગામ તાલુકાના અચ્છારી ગામે રવિવારે રાત્રે ફટાકડા ફોડવા જેવી સામાન્ય બાબતે બે પક્ષો વચ્ચે ઉગ્ર બોલાચાલી બાદ મામલો બિચક્યો હતો. બંને પક્ષોએ એકબીજા પર ઈંટો અને ઢીકાપાટુ વડે હુમલો કરતા અનેક યુવાનો લોહીલુહાણ થયા હતા. આ મામલે ભિલાડ પોલીસ મથકે બંને પક્ષોએ સામસામી ફરિયાદ નોંધાવી છે.
પ્રથમ ફરિયાદ અનુસાર, ફરિયાદી રાકેશભાઈ ભીખુભાઈ વારલીએ જણાવ્યું હતું કે, રવિવારે રાત્રે ભારત ક્રિકેટ મેચ જીતી જતાં તેમનો પિતરાઈ ભાઈ સંદીપ ઘર આંગણે ફટાકડા ફોડી રહ્યો હતો. આ સમયે પાડોશમાં રહેતા ભાવેશ હળપતી, આકાશ, ધર્મેશ અને પ્રીન્સ હળપતી ત્યાં આવ્યા હતા અને ‘ફટાકડા કેમ ફોડો છો?’ તેમ કહી ઝઘડો શરૂ કર્યો હતો. આ શખ્સોએ ઉશ્કેરાઈને રાકેશભાઈ અને રોહિત નામના યુવાનના માથામાં ઈંટો મારી ગંભીર ઈજા પહોંચાડી હતી. સામે પક્ષે ધર્મેશભાઈ ભરતભાઈ હળપતીએ નોંધાવેલી ફરિયાદ મુજબ, તેમના કુટુંબી મુકેશભાઈએ ફટાકડા ફોડવાની ના પાડતા સામા પક્ષના નિમેશ ધોડી, રાકેશ વારલી, રોહિત અને અમિત વારલીએ ઉશ્કેરાઈને હુમલો કર્યો હતો. જેમાં સચિન અને પ્રીન્સ નામના યુવાનોને માથાના ભાગે ઈંટો વાગતા તેઓને હોસ્પિટલમાં ટાંકા લેવા પડ્યા હતા.ભિલાડ પોલીસે બંને પક્ષોની ફરિયાદના આધારે ગુનો નોંધી વધુ તપાસ હાથ ધરી છે.
