નવી દિલ્હી/ગાઝિયાબાદ: ઉત્તર પ્રદેશની ગાઝિયાબાદ પોલીસે પાકિસ્તાની જાસૂસી સંસ્થા ISI સાથે જોડાયેલા એક હાઈ-પ્રોફાઈલ રેકેટનો પર્દાફાશ કરીને સનસનાટી મચાવી દીધી છે. પોલીસ દ્વારા આ મામલે મુખ્ય માસ્ટરમાઈન્ડ સુહૈલ મલિક અને મહિલા ઓપરેટર ઈરમ સહિત કુલ 11 આરોપીઓની ધરપકડ કરવામાં આવી છે.
તપાસમાં બહાર આવેલી વિગતો મુજબ, આ ગેંગ દિલ્હી અને સોનીપત રેલવે સ્ટેશન જેવા સંવેદનશીલ સ્થળો પર ગુપ્ત CCTV કેમેરા લગાવીને ભારતીય સૈન્યની મૂવમેન્ટ, હથિયારોની હેરફેર અને અન્ય વ્યૂહાત્મક વિગતોની લાઈવ ફીડ સીધી પાકિસ્તાનમાં બેઠેલા હેન્ડલર્સને મોકલવાની યોજના ધરાવતી હતી. કેટલાક સ્થળોએ કેમેરા લગાવી પણ દેવામાં આવ્યા હતા, જે પોલીસે જપ્ત કર્યા છે.
નેટવર્કનું સંચાલન સુહૈલ મલિક (ઉર્ફે રોમિયો), નૌશાદ અલી, સમીર (ઉર્ફે શૂટર) અને ઈરમ દ્વારા કરવામાં આવતું હતું.આ જાસૂસી જાળ ઉત્તર પ્રદેશ, બિહાર, હરિયાણા, મહારાષ્ટ્ર અને નેપાળ સુધી ફેલાયેલી હતી.આરોપીઓ સ્નેચિંગ કરેલા અથવા સંબંધીઓના નામે મેળવેલા સિમકાર્ડનો ઉપયોગ કરતા હતા. ભારતીય નંબરના OTP વિદેશ મોકલી સોશિયલ મીડિયા એકાઉન્ટ્સ ઓપરેટ થતા હતા.પાકિસ્તાની હેન્ડલર્સ દ્વારા ખાસ ટ્રેનિંગ આપીને મોબાઈલમાં વિશેષ એપ્લિકેશન ઈન્સ્ટોલ કરાવવામાં આવી હતી, જેના દ્વારા GPS લોકેશન અને વીડિયો મોકલવામાં આવતા.જાસૂસીના બદલામાં આરોપીઓને રૂ.500 થી રૂ.5000 ચૂકવવામાં આવતા હતા. આ પેમેન્ટ સીધા ખાતામાં લેવાને બદલે UPI દ્વારા અન્ય આડકતરી રીતે મેળવવામાં આવતું હતું.પોલીસે જણાવ્યું કે પકડાયેલા આરોપીઓની પૂછપરછમાં સૈન્ય સુરક્ષાને લગતી વધુ ચોંકાવનારી વિગતો સામે આવી શકે તેમ છે. હાલ આ સમગ્ર કેસની ઊંડાણપૂર્વક તપાસ માટે સ્પેશિયલ ઇન્વેસ્ટિગેશન ટીમ (SIT) ની રચના કરવામાં આવી છે.
