કોલકાતા હાઈકોર્ટે તૃણમૂલ કોંગ્રેસ (TMC)ને મહત્વપૂર્ણ રાહત આપતાં પાર્ટીના ફ્રીઝ કરાયેલા ત્રણ બેંક ખાતાઓમાંથી મર્યાદિત નાણાકીય લેવડદેવડ ફરી શરૂ કરવાની મંજૂરી આપી છે. કોર્ટે આ વચગાળાની વ્યવસ્થા આગામી 30 સપ્ટેમ્બર સુધી અમલમાં રહેશે તેમ જણાવ્યું છે.કોર્ટના આદેશ મુજબ, આ ખાતાઓમાંથી માત્ર પક્ષના રોજિંદા વહીવટી અને આવશ્યક ખર્ચ માટે જ નાણાંનો ઉપયોગ કરી શકાશે. અન્ય કોઈ પ્રકારના ખર્ચ અથવા ચૂકવણી માટે મંજૂરી આપવામાં આવશે નહીં.
નાણાકીય વ્યવહારોમાં પારદર્શિતા જળવાઈ રહે તે માટે કોર્ટે નિવૃત્ત ન્યાયાધીશ જસ્ટિસ સુબ્રત તાલુકદારને સ્પેશિયલ ઓફિસર તરીકે નિયુક્ત કર્યા છે. તેઓ TMCના બે અધિકૃત હોદ્દેદારોની સંયુક્ત સહીવાળા ચેકના આધારે જ ખર્ચને મંજૂરી આપશે અને સમગ્ર પ્રક્રિયા પર દેખરેખ રાખશે.સુનાવણી દરમિયાન કોર્ટે ફરિયાદી અને પોલીસ બંને સામે કેટલાક મહત્વપૂર્ણ સવાલો ઉઠાવ્યા હતા. કોર્ટે ફરિયાદીને પૂછ્યું કે 4 મે પહેલાં આ મામલે સત્તાવાર ફરિયાદ શા માટે નોંધાવવામાં આવી નહોતી. સાથે જ એ પણ નોંધ્યું કે ફરિયાદીએ અગાઉ આ જ બેંક ખાતાઓમાંથી નાણાં સ્વીકાર્યા હતા અને ત્યારબાદ ચૂંટણી લડી ધારાસભ્ય તરીકે ચૂંટાયા હતા.પોલીસને પણ કોર્ટે પૂછ્યું કે કયા આધાર અને કયા દસ્તાવેજોના આધારે પક્ષના બેંક ખાતાઓ ફ્રીઝ કરવાની કાર્યવાહી કરવામાં આવી હતી.
TMC તરફથી હાજર વકીલ અર્ક કુમાર નાગે કોર્ટના આદેશ અંગે જણાવ્યું કે પક્ષે જરૂરી ખર્ચની સંપૂર્ણ વિગતો પૂરક સોગંદનામા દ્વારા કોર્ટ સમક્ષ રજૂ કરી છે. હવે સ્પેશિયલ ઓફિસરની દેખરેખ હેઠળ અને અધિકૃત સહીવાળા ચેકના આધારે જ તમામ મંજૂર નાણાકીય વ્યવહારો કરવામાં આવશે.કોર્ટના આ વચગાળાના આદેશથી TMCને પક્ષના દૈનિક વહીવટી કામકાજ અને જરૂરી ખર્ચ માટે રાહત મળી છે, જ્યારે સમગ્ર નાણાકીય પ્રક્રિયા પર કોર્ટ દ્વારા નિયુક્ત સ્પેશિયલ ઓફિસરની દેખરેખ યથાવત રહેશે.
