રાંચી: ઝારખંડના JPSC પેપર લીક કાંડની CID તપાસમાં મોટો ખુલાસો થયો છે. ધરપકડ કરાયેલા અભય તિવારીએ પૂછપરછમાં જણાવ્યું હોવાનું સામે આવ્યું છે કે FRO અને ACFની પરીક્ષાની સીટ અપાવવાના નામે ઉમેદવારો પાસેથી કરોડો રૂપિયા વસૂલવામાં આવ્યા હતા.
CID મુજબ FROની એક સીટ માટે રૂ.20થી 25 લાખ અને ACF માટે રૂ.30થી 35 લાખ સુધીની રકમ નક્કી કરાઈ હતી. અભય અને તેના સાથીઓએ FROના 12 તથા ACFના 8 ઉમેદવારો પાસેથી કુલ રૂ.5.80 કરોડ જેટલી વસૂલાત કરી હતી. આ 20માંથી 19 ઉમેદવારો પાસ થયા હોવાનું પણ તપાસમાં સામે આવ્યું છે.બીજી તરફ, પરીક્ષાની ડેપ્યુટી ડિરેક્ટર શ્વેતા ગુપ્તાએ CID સમક્ષ આપેલા નિવેદનમાં તત્કાલીન અધ્યક્ષ એલ. ખ્યાંગતે પર પરિણામ જાહેર કરવા દબાણ કરવાનો આરોપ મૂક્યો છે. તેમનો દાવો છે કે તેઓ પરિણામ જાહેર કરવા ઈચ્છતા નહોતા.
તપાસમાં JPSC અને પરીક્ષા સંચાલક એજન્સી સાથે જોડાયેલા કથિત વચેટિયાઓની ભૂમિકા પણ સામે આવી છે. હાઈકોર્ટમાં દાખલ PILને મેનેજ કરવા માટે રૂ.3 કરોડની ડીલ થયાનો દાવો પણ અભયના નિવેદનમાં કરવામાં આવ્યો છે. CID હવે સાનંદ પ્રકાશ, રવિ માસ્ટર સહિત અન્ય કથિત દલાલોની શોધખોળ કરી રહી છે.
