ઝારખંડના ગિરિડીહ વિસ્તારમાં જંગલી ભમરીનાં હુમલાઓએ ભારે હાહાકાર મચાવ્યો છે. છેલ્લા 25 દિવસમાં જ ભમરીના ઝેરી ડંખના કારણે પાંચ લોકોનાં મોત નીપજયાં છે, જ્યારે અલગ-અલગ વિસ્તારોમાં 200થી વધુ લોકો આ હુમલાનો શિકાર બન્યા છે. 60 થી વધુ લોકોને ગંભીર હાલતમાં સરકારી હોસ્પિટલમાં સારવાર અર્થે ખસેડવામાં આવ્યા છે. સ્થાનિક તબીબોના જણાવ્યા મુજબ, આ ભમરીનો ડંખ અત્યંત ઝેરી અને ખતરનાક હોય છે. ડંખ મારતા જ શરીરમાં અસહ્ય બળતરા, સોજો અને એલર્જિક રિએક્શન આવે છે.
છેલ્લા 4-5 વર્ષોમાં આ વિસ્તારમાં ભમરીના હુમલાથી 20થી વધુ લોકોએ જીવ ગુમાવ્યા હોવાના અહેવાલ છે. આ જંગલી ભમરીની ઓળખ ‘એશિયન જાયન્ટ હોર્નેટ’ તરીકે કરવામાં આવી છે. આ ભમરી લગભગ 1.5 થી 2 ઇંચ લાંબી હોય છે અને તેના શરીર પર વાઘ જેવી પીળી અને કાળી પટ્ટીઓ હોય છે. સ્થાનિકોના જણાવ્યા મુજબ, આ ભમરી શરીર પર ચોંટી જાય પછી જલ્દી છોડતી નથી અને સતત ડંખ મારતી રહે છે. વન વિભાગના રેન્જરના જણાવ્યા અનુસાર, આ પ્રજાતિ અન્ય કોઈ વિસ્તારમાંથી અહીં સ્થળાંતરિત થઈ હોવાની શક્યતા છે.(સૌજન્ય)
