ભાવનગરની સરકારી મેડિકલ કોલેજના એસોસિયેટ પ્રોફેસરનો તેમના જ બંધ ફ્લેટમાંથી ડી-કમ્પોઝ હાલતમાં શંકાસ્પદ મૃતદેહ મળી આવતાં સમગ્ર મેડિકલ આલમ સહિત શહેરમાં ભારે ચકચાર મચી ગઈ હતી. ઘટનાની જાણ થતાં જ ભરતનગર પોલીસ કાફલો સ્થળ પર પહોંચી ગયો હતો અને મૃતદેહને પોસ્ટમોર્ટમ અર્થે સર ટી. હોસ્પિટલ ખસેડી આગળની તપાસ હાથ ધરી હતી. મળતી વિગતો અનુસાર, મૂળ અમદાવાદના વતની અને ભાવનગર સરકારી મેડિકલ કોલેજના એનાટોમી વિભાગમાં એસોસિયેટ પ્રોફેસર તરીકે ફરજ બજાવતા ડો.કિન્નર એસ. દેસાઈ છેલ્લા ચાર દિવસથી કોલેજમાં ગેરહાજર રહ્યા હતા.
તેમનો સંપર્ક કરવા છતાં ફોન પર કોઈ જવાબ મળતો ન હતો. આથી શંકા જતાં તેમના જ વિભાગના એક સાથી તબીબે તાત્કાલિક પોલીસને જાણ કરી હતી. સાથી તબીબની જાણના આધારે ભરતનગર પોલીસ મથકના પી.આઈ. સહિતનો પોલીસ કાફલો ટોપ-૩ સર્કલ નજીક આવેલી ગોકુળધામ સોસાયટીના કે વિંગ ખાતે પહોંચ્યો હતો. ફ્લેટ અંદરથી બંધ હોવાથી પોલીસે ફાયર બ્રિગેડની મદદ લઈ દરવાજો તોડાવ્યો હતો. દરવાજો ખુલતા જ અંદરથી તીવ્ર દુર્ગંધ આવી હતી અને ડો.દેસાઈનો મૃતદેહ અત્યંત ડી-કમ્પોઝ હાલતમાં મળી આવ્યો હતો.પોલીસે મૃતદેહનો કબજો મેળવીને કાયદેસરની કાર્યવાહી હાથ ધરી હતી.
તેમજ મૃતદેહને પીએમ અર્થે સર ટી. હોસ્પિટલ ખાતે ખસેડયો છે. ડો.કિન્નર દેસાઈનું મૃત્યુ કુદરતી છે, અકસ્માત છે કે, પછી અન્ય કોઈ કારણોસર થયું છે તે અંગે હાલ કોઈ સત્તાવાર સ્પષ્ટતા થઈ નથી. ભરતનગર પોલીસના જણાવ્યા અનુસાર, પોસ્ટમોર્ટમ રિપોર્ટ આવ્યા બાદ જ મોતનું સાચું કારણ સ્પષ્ટ થઈ શકશે. એક હોનહાર પ્રોફેસરના આકસ્મિક અને શંકાસ્પદ અવસાનથી મેડિકલ કોલેજ પરિવારમાં ભારે શોકની લાગણી છવાઈ ગઈ હતી.
