પટણા : બિહારમાં ભારે વરસાદને પગલે પૂરની સ્થિતિ વધુ ગંભીર બની છે. ગંગા સહિતની અનેક નદીઓ ભયજનક સપાટીથી ઉપર વહી રહી છે અને અનેક સ્થળે બંધમાં ભંગાણ પડ્યું છે. રાજ્યના ૧૫ જિલ્લાઓમાં ૪૬.૮૮ લાખ લોકો પૂરથી અસરગ્રસ્ત થયા છે.
પૂરથી ૮૮ બ્લોકની ૫૬૧ ગ્રામ પંચાયતો અસરગ્રસ્ત બની છે. ભાગલપુર, પટણા, સારણ, વૈશાલી, બેગુસરાઇ, કટિહાર, પૂર્ણિયા અને બક્સર સહિતના જિલ્લાઓમાં સ્થિતિ કફોડી છે. અસરગ્રસ્ત બંધો પર ૨૪ કલાક દેખરેખ રાખવામાં આવી રહી છે. નેપાળ અને બિહારમાં ભારે વરસાદના કારણે નદીઓ અને જળાશયોમાં પાણીનું સ્તર સતત વધી રહ્યું છે. સપ્ટેમ્બરમાં અત્યાર સુધી સામાન્ય કરતાં ૨૦ ટકા વધુ એટલે કે ૯૦ મિમી વરસાદ નોંધાયો છે.
