પારડીનાં સ્વાતિ કોલોની વિસ્તારમાં આવેલ રહેણાક વિસ્તારમાં ગેરકાયદે ચાલતા ગેસ સિલિન્ડરના ગોડાઉન સામે મામલતદાર કિરણસિંહ રાણાની આગેવાની હેઠળ પુરવઠા વિભાગની ટીમે કાર્યવાહી કરી હતી. 
તંત્રની ટીમે પાડેલા દરોડા દરમિયાન, પ્રિયાંશી એન્ટરપ્રાઈઝ નામની ગો ગેસ કંપનીનાં પારડીનાં એજન્ટ મહેશ ગંગારામ બંસીવાલાના ઘરની બાજુમાં આવેલા ખુલ્લા પ્લોટમાંથી ગેસના કુલ ૬૯ નાના-મોટા સિલિન્ડર મળી આવ્યા હતા. આ સિલિન્ડરો પૈકી ૧૫ કિલોના ૬ સિલિન્ડર ભરેલી હાલતમાં હતા.
તપાસ દરમિયાન સ્થળ ઉપર ફાયર સેફ્ટીના કોઈપણ સાધનો મળ્યા ન હતા. વધુમાં નિયમ મુજબ પેસો (એક્સ્પ્લોઝિવ પેટ્રોલિયમ એન્ડ સેફ્ટી ઓર્ગેનાઈઝેશન) અમદાવાદ તરફથી મેળવવાનું ફાયર સેફ્ટી એન.ઓ.સી. પણ મેળવવામાં આવ્યું ન હોવાનું બહાર આવ્યું હતું. પુરવઠા વિભાગના સુત્રોના જણાવ્યા મુજબ જિલ્લા પુરવઠા અધિકારી તરફથી આ મામલે હવે વધુ કાર્યવાહી હાથ ધરવામાં આવશે.
