વાલોડના બાજીપુરા ગામની સીમમાં નેશનલ હાઈવે નંબર-53 પરથી ક્રૂરતાપૂર્વક પશુઓની હેરાફેરી કરી રહેલા એક ટ્રકને પોલીસે ઝડપી પાડ્યો છે. ટ્રકમાંથી કુલ 9 ભેંસો મળી આવી છે, જેમને અત્યંત દયનીય હાલતમાં બાંધવામાં આવી હતી.
પોલીસ સુત્રો પાસેથી મળતી માહિતી પ્રમાણે શનિવારની રાત્રે વાલોડ પોલીસની ટીમ બાજીપુરા નાકા પોઈન્ટ પર વોચમાં હતી. તે દરમિયાન એનીમલ વેલ્ફર બોર્ડ ઓફ ઈન્ડિયાના સભ્યોની બાતમીના આધારે એક ટાટા ટ્રક નંબર GJ-07-YY-3560 ને રોકવામાં આવ્યો હતો. તપાસ કરતા જાણવા મળ્યું કે ટ્રકની પાછળ લાકડાના પાટિયા મારીને તેમાં ઘાસચારા કે પાણીની સુવિધા વગર 9 ભેંસોને ખીચોખીચ ભરી દેવામાં આવી હતી.
પોલીસે આ કાર્યવાહીમાં 9 ભેંસો અને ટ્રક મળી કુલ રૂ.7.70 લાખનો મુદ્દામાલ કબજે કર્યો છે. આ મામલે ટ્રક ચાલક બજરૂદ્દીન બશીરખાન પઠાણ (રહે.ભરૂચ) ની સ્થળ પર જ ધરપકડ કરવામાં આવી છે, જ્યારે ભેંસો ભરી આપનાર અન્ય આરોપી શહેબાજ યુસુફ મરોઠી (રહે ભરૂચ) ને વોન્ટેડ જાહેર કરવામાં આવ્યો છે. આરોપીઓ વિરુદ્ધ વિવિધ કલમો હેઠળ ગુનો નોંધી આગળની વધુ તપાસ હાથ ધરવામાં આવી છે.
