વૈશ્વિક સ્તરે ચાલી રહેલા ખાડી યુદ્ધ (Gulf War) ના કારણે બાંધકામ ક્ષેત્રે વપરાતી સામગ્રીમાં અસાધારણ ભાવવધારો થતા કોન્ટ્રાક્ટરોની હાલત કફોડી બની છે. આ ગંભીર પરિસ્થિતિમાં રાહત આપવાની માંગ સાથે તાપી જિલ્લા કોન્ટ્રાક્ટર્સ એસોસીએશન દ્વારા જિલ્લા કલેક્ટર મારફતે રાજ્યના મુખ્યમંત્રીને આવેદન પત્ર પાઠવવામાં આવ્યું છે.
સરકારી કામો અધવચ્ચે અટકી પડવાની ભીતિ આવેદન પત્રમાં જણાવ્યા અનુસાર, રજીસ્ટર્ડ કોન્ટ્રાક્ટરો રાજ્યના વિવિધ વિભાગોના રોડ, રસ્તા, પુલ, ડેમ, કેનાલ, હોસ્પિટલ અને બિલ્ડીંગો જેવા વિકાસના કામો સાથે જોડાયેલા છે. અગાઉ જ્યારે ટેન્ડરો ભર્યા હતા ત્યારે તત્કાલીન બજાર ભાવ અને સરકારી એસ.ઓ.આર. (S.O.R.) મુજબ ગણતરી કરવામાં આવી હતી.
પરંતુ હાલમાં બીટુમીન, સિમેન્ટ, સ્ટીલ, ડીઝલ, ઇલેક્ટ્રિકલ વાયર અને ફ્લોરિંગ ટાઇલ્સ જેવી સામગ્રીના ભાવમાં તોતિંગ વધારો થતા જૂના દરે કામ પૂર્ણ કરવું આર્થિક રીતે અશક્ય બન્યું છે. જો આ સ્થિતિ લાંબી ચાલશે તો અનેક કામો અધવચ્ચે બંધ થવાની શક્યતા છે.
કોન્ટ્રાક્ટર્સ એસોસીએશન દ્વારા બાંધકામ સામગ્રીમાં થયેલા વધારા સામે વાસ્તવિક બજાર ભાવ અથવા ઇન્વોઇસના આધારે સીધા તફાવતની રકમ ચૂકવવામાં આવે,હાલમાં કાર્યરત પ્રોજેક્ટ્સમાં કોઇપણ પેનલ્ટી વગર સમય મર્યાદા વધારી આપવા માટે નીતિગત રાહત આપવામાં આવે,આ પ્રશ્ને વિસ્તૃત ચર્ચા કરવા ગુજરાત કોન્ટ્રાક્ટર્સ એસોસીએશનના પ્રતિનિધિ મંડળને મુખ્યમંત્રી સાથે મુલાકાત માટે સમય ફાળવવા સહિતની માંગણીઓ કરી હતી.તાપી જિલ્લા કોન્ટ્રાક્ટર્સ એસોસીએશનના પ્રમુખ ભીખાભાઈ ઓ. રમણી અને અન્ય હોદ્દેદારોએ આ બાબતે તાત્કાલિક યોગ્ય માર્ગદર્શન અને સહાય પૂરી પાડવા સરકારને નમ્ર વિનંતી કરી છે.
