સુરત ગ્રામ્ય એલ.સી.બી. અને પેરોલ ફર્લો સ્ક્વોડની ટીમે સંયુક્ત ઓપરેશન હાથ ધરી બારડોલીના ઉવાગામની હદમાં નેશનલ હાઈવે નંબર -53 પરથી એક કન્ટેનર ઝડપી પાડ્યું હતું. તપાસ દરમિયાન કન્ટેનરમાં બનાવેલા ગુપ્ત ચોરખાનામાંથી રૂ.38.59 લાખની કિંમતનો વિદેશી દારૂનો જથ્થો મળી આવતા પોલીસે કુલ રૂ.53.82 લાખનો મુદ્દામાલ જપ્ત કર્યો છે.
સુરત ગ્રામ્ય એલ.સી.બી. અને પેરોલ ફર્લો સ્ક્વોડની ટીમને બાતમી મળી હતી કે એક ટાટા કન્ટેનર નં. NL-01-AC-2152 માં દારૂનો જથ્થો ભરીને ધુલિયા-સોનગઢ થઈ વડોદરા તરફ જઈ રહ્યો છે. આ બાતમીના આધારે ઉવાગામ પાસે શ્રી હરિ ઇન્ડસ્ટ્રીઝની સામે વોચ ગોઠવી પોલીસે કન્ટેનરને અટકાવ્યું હતું.પોલીસે કન્ટેનરની તલાશી લેતા અંદર બનાવેલા ખાસ ગુપ્ત ચોરખાનામાંથી વિદેશી દારૂની કુલ 25,782 બોટલો મળી આવી હતી.
પકડાયેલા આરોપીઓની પૂછપરછમાં જાણવા મળ્યું હતું કે આ જથ્થો હરિયાણાના અંબાલા બાયપાસ પરથી ભરી આપવામાં આવ્યો હતો અને વડોદરા ખાતે પહોંચાડવાનો હતો.પોલીસે સ્થળ પરથી બે આરોપીઓ ડુંગરારામ પુરારામ ચૌધરી (ડ્રાઈવર) રહે. બાડમેર, રાજસ્થાન અને સરૂપારામ દેદારામ જાટ (ક્લીનર) રહે. બાડમેર, રાજસ્થાન.ની ધરપકડ કરી છે.જ્યારે દારૂ ભરાવનાર સઈરામ બિશ્નોઈ (બાડમેર) સહિત અન્ય બે અજાણ્યા ઈસમોને પોલીસે વોન્ટેડ જાહેર કર્યા છે.
