ગિફ્ટ હેમ્પર બનાવતી કંપનીની એજન્સી અપાવવાની લાલચ આપી નાગરિકો સાથે સાયબર ફ્રોડ આચરતી ટોળકીના એક સાગરીતને કુકરમુંડા પોલીસે મુંબઈથી ઝડપી પાડવામાં સફળતા મેળવી છે. પોલીસે ટેકનિકલ એનાલિસિસના આધારે આરોપીને શોધી કાઢી ફરિયાદીના રૂ.2,50,000 પરત અપાવવાની પ્રશંસનીય કામગીરી કરી છે.
વિગતો પ્રમાણે મુંબઈના મલાડ પૂર્વ વિસ્તારમાં રહેતા આરોપી મોહમદ યુસુફ અબ્દુલ સીદ્દિકીએ ફરિયાદીને ગિફ્ટ હેમ્પર બનાવવાની એજન્સીમાં મોટું કમિશન મેળવવાની લાલચ આપી હતી. આ લાલચમાં આવીને ફરિયાદીએ પોતાના બેંક ઓફ બરોડાના એકાઉન્ટ તેમજ પિતરાઈ ભાઈ અને મિત્રના UPI આઈડી અને ગુગલ-પે મારફતે અલગ-અલગ તારીખે કુલ રૂ.2,50,000 નું ઓનલાઇન ટ્રાન્ઝેક્શન કર્યું હતું.
નાણાં મેળવ્યા બાદ આરોપીએ ગિફ્ટ હેમ્પર પણ ન બનાવી આપ્યા અને નાણાં પણ પરત ન કરી વિશ્વાસઘાત કર્યો હતો.આ મામલે કુકરમુંડા પોલીસ સ્ટેશનમાં વિવિધ કલમો હેઠળ ગુનો નોંધવામાં આવ્યો હતો. આ ગુનામાં સંડોવાયેલા અન્ય બે શખ્સો (૧) શશાંક સિંઘ અને (૨) ગૌતમ મુલચંદ ગુપ્તાને પોલીસે વોન્ટેડ જાહેર કર્યા છે.
