સોનગઢમાં ભાડુઆતની માહિતી પોલીસને ન આપી જાહેરનામાનો ભંગ કરનાર બે અલગ-અલગ દુકાન માલિકો સામે પોલીસે લાલ આંખ કરી છે. તાપી એસ.ઓ.જી. શાખા દ્વારા હાથ ધરવામાં આવેલા પેટ્રોલિંગ દરમિયાન આ બેદરકારી સામે આવતા બંને માલિકો વિરુદ્ધ ગુનો નોંધવામાં આવ્યો છે.
મળતી માહિતી અનુસાર તાપી તા.23મી એપ્રિલ નારોજ એસ.ઓ.જી. શાખાની ટીમ જ્યારે સોનગઢ-ઉકાઈ રોડ પર આવેલ ‘સનસીટી શોપિંગ સેન્ટર’ માં ભાડુઆત તપાસણી માટે પહોંચી હતી, ત્યારે બે દુકાનોમાં નિયમોનું ઉલ્લંઘન જોવા મળ્યું હતું. આ મામલે પ્રથમ કેસમાં દુકાન નંબર B-19 ના માલિક મુકેશભાઈ પીતામ્બરભાઇ પાટીલ (રહે.ઉકાઈ) એ પોતાની દુકાન ભાડે આપી હતી, પરંતુ ભાડુઆતનું કોઈ આઈ.ડી. પ્રૂફ લીધું નહોતું કે પોલીસમાં તેની જાણ કરી નહોતી. જયારે બીજો કેસમાં દુકાન નંબર A-8 ના માલિક શ્રીહિમ્મતભાઇ નારાયણભાઇ વિરવાલ (રહે.સોનગઢ) એ પણ પોતાની દુકાન ભાડે આપતી વખતે ભાડુઆતની વિગતો નજીકના પોલીસ સ્ટેશનમાં જમા કરાવી નહોતી. આ મામલે જિલ્લા મેજિસ્ટ્રેટના જાહેરનામાનો ભંગ કરવા બદલ બંને આરોપીઓ સામે પોલીસમાં ગુનો નોંધી આગળની તપાસ હાથ ધરવામાં આવી છે.
