વ્યારા: વ્યારા તાલુકાના સરૈયા ગામે પિયર રહેતી અને ટીચકીયા સબ સેન્ટર ખાતે સી.એચ.ઓ. તરીકે ફરજ બજાવતી યુવતી પર તેના પતિએ હિંસક હુમલો કર્યો હોવાની ઘટના સામે આવી છે. પોલીસ મથકે નોંધાયેલી વિગતો અનુસાર, બીનાબેન યાકુબભાઈ ગામીત છેલ્લા બે વર્ષથી પતિ સાથે અણબનાવ હોવાથી પિયરમાં રહી પોતાની પાંચ વર્ષની પુત્રીનું ગુજરાન ચલાવે છે.
ગુરુવારના રોજ બીનાબેન પોતાની પુત્રી સાથે જેઠના ઘરે તેમને મળવા ગયા હતા. તે દરમિયાન ત્યાં ધસી આ
વેલા પતિ યાકુબભાઈ અશોકભાઈ ગામીતે “તું અહીં કેમ આવી છે?” તેમ કહી ઝઘડો કર્યો હતો. ઉશ્કેરાયેલા પતિએ બીનાબેનને ઢીક-મુક્કીનો માર મારી, માથું દરવાજા સાથે અથાડી દેતા તેમને ગંભીર ઈજા પહોંચી હતી.
આ દરમિયાન વચ્ચે છોડાવવા પડેલા જેઠાણી ભાવનાબેનને પણ આરોપીએ માર માર્યો હતો અને જાનથી મારી નાખવાની ધમકી આપી નાસી છૂટ્યો હતો. ઈજાગ્રસ્ત બીનાબેનને ૧૦૮ એમ્બ્યુલન્સ મારફતે વ્યારા જનરલ હોસ્પિટલ ખસેડવામાં આવ્યા હતા. વ્યારા પોલીસે આ મામલે ગુનો નોંધી વધુ તપાસ શરુ કરી છે.
